සටන් විරාම ගිවිසුම අත්සන් කළ පසු ඉදිරිපත් කළ අයවැය රනිල් වික්‍රමසිංහ මහතාට සුනාමියක්‌වූවා සේ ඉදිරි අයවැයත් මහින්ද රාජපක්ෂ ජනාධිපතිවරයාට සුනාමියක්‌ වෙනවා ස්‌ථීර යැයි ජනතා විමුක්‌ති පෙරමුණේ හිටපු පාර්ලිමේන්තු මන්ත්‍රී කේ.ඩී.ලාල්කාන්ත මහතා ඊයේ (12) ප්‍රකාශ කළේය. පැලවත්ත පිහිටි ජනතා විමුක්‌ති පෙරමුණේ ප්‍රධාන කාර්යාලයේ පැවැති මාධ්‍ය හමුවකදී වැඩිදුරටත් අදහස්‌ දැක්‌වු ලාල්කාන්ත මහතා මෙසේද පැවසීය. තව වසර හයකින් මහ මැතිවරණයක්‌ නැහැ. අවුරුදු හයහමාරකින් ජනාධිපතිවරණයක්‌ නැහැ. මේ කාලයේදී ව්‍යවස්‌ථා සංශෝධනය ප්‍රධාන මාතෘකාව ලෙස ගෙන සාකච්ඡා කළොත් සමාජයේ ඇත්ත ප්‍රශ්න ආණ්‌ඩුව විසින් යටපත් කරයි. එනිසා ඇත්ත ප්‍රශ්න ව්‍යවස්‌ථා සංශෝධනයකින් යටපත් කරන්න ඉඩ නොදිය යුතුයි. ජනතාවගේ ඇත්ත ප්‍රශ්න ඉදිරියට ගෙන ඒ සඳහා ජනතාව පෙළ ගැස්‌විය යුතුයි.
මේ අලුත් ආණ්‌ඩුව විසින් ඉදිරියේදී ගෙන එන පළමු අයවැය රටේ ජනතාවගේ තත්ත්වය තිබූ ආකාරයට වඩා හොඳ තැනකට ගෙන එන්නේ නැහැ. එමගින් මෙතෙක්‌ ජනතාවට තිබූ වරප්‍රසාද, අයිතිවාසිකම් ගණනාවක්‌ කප්පාදු වෙන බව සහතිකයි. ජනතාවටම හොඳ අයවැයක්‌ ගෙන එන්න පුළුවන් නම් අනිවාර්යයෙන්ම එය ජනාධිපතිවරණයට සහ මහ මැතිවරණයට පෙර ගෙන එන්න තිබුණා. එම නිසා මේ ආණ්‌ඩුව තමන්ගේ පළමු අයවැයෙන්ම මෙතෙක්‌ ලද ජනතා විශ්වාසය නැති කර ගන්නා බව ස්‌ථීරයි. ඒ විශ්වාසය බිඳ වැටෙන ජනතාව ඒකරාශී කරගෙන අප ජනතා බලවේගයක්‌ ගොඩ නගනවා."
